Vanglaini Bihchianna: Entrepreneur Huang : India rama skills hmanga intihsiakna lian berah Mizo an ropui; Worldskills 2024-ah India aiawhin Mizo 2 an kal dawn
Ministry of Skill Development (MSDE) hnuaia NSDC leh Skill India ṭang kawpin National Skill Competition - Indiaskills: 2024, May 15 - 20, 2024 chhunga Yashobhoomi Covention Centre, Dwarka, New Delhi-a an buatsaihah Mizo an che ropui hle a, medal pariat an la. Medal latu zinga pahnihin kumin September thlaa France rama Wordskills Competition neih turah India ai an awh dawn.
Indiaskills: 2024-a medal latute
1. Maximus Lalruatkima - Gold (Floristry)
2. Vanlalbiakdiki - Gold (Shoe Making)
3. Emily VL Ṭhakimi - Gold (Fashion Technology)
4. Anthony Lalchhanhima - Silver (Drone Film Making)
5. Laltlanzovi - Medallion of Excellence (MoE), (Hair Dressing)
6. Vanlalhriatchhungi - Medallion of Excellence (MoE), (Beauty Therapy)
7. Liansangrem - Medallion of Excellence (MoE), (Plumbing & Heating)
8. Lallawmkima - Medallion of Excellence (MoE), (Electrical Installation)
Angela Zothanpuii, Director LESDE Department chuan, “State dang tam tak anga boot camp kan kal ve hman lo chung pawhin medal pariat lai an la thei hi kan naute an chhuanawm tak zet. UPSC result chhuah apianga kan dem rawn Mizo ṭhalaite hi Pathianin kut themthiamna ‘natural talent’ ṭha tak a pe a, officer line ringawta nawr luih tum loin an thiam sa, an tuina zawng eizawnna changtlung kan kawhhmuh thiam a ngai tawh tak zet. Hetiang an talent pho chhuahna remchang kan neih theih avang hian kan Department chu kan lawm tak zet a ni,” a ti.
Indiaskills - Worldskills Competition
Themthiamna hmanga khawvel inelna lian ber Worldskills Competition-Skill Olympic an tih bawk chu kum 1950 khan Madrid, Spain-ah ram 80 inzawm khawmte'n an hmang ṭan. Tunah hian member ram 86 awm tawhin, WorldskillsCompetition:2024 hi Lyon, France-ah September 10-15 chhungin neih a ni dawn a, a vawi 47-na tur a ni. Worldskills-ah hian affilliated trade 63 intihsiak theihna a awm mek a, affiliated trade ni tur hian skill trade pakhat hi ram panga talin intihsiakna atan an hman a ngai a, chumi tling pha lo chu Demo Skills tia vuah a ni. India hi kum 2007 aṭang khan member niin a tel ṭan a, kumin hi ṭum kua a telna tur niin trade 57 intihsiakna huangah tel a tum.Worldskills Competition-a tel tur hian national level Indiaskills Competition buatsaiha trade tina ti ṭha pahnih zel hi India aiawh tura thlan an ni ṭhin.
Kuminah hian intihsiakna hi Onsite Delhi-ah trade 47 leh Offsite, Karnataka-ah trade 14, a vaiin trade 61-ah intihsiakna buatsaih a ni. Indiaskills Competition-a tel tur hian level hrang hrang - district, state leh regional level paltlang hnuah chauh tel theih a ni.
Kumin hian hun a tepter avangin state level winner-te chu pre-national online test hmanga screening neih a nih hnuah Indiaskills Competition-ah intihsiakna an hmachhawn a; he intihsiaknaa tel thei chin hi kum 21 hnuai lam chauh an ni.
Mizoram hi Indiaskills Competition-ah hian kum 2022 aṭang khan tel ṭanin, kumin hi a ṭum hnih telna a ni. Kum 2022 khan trade pakuaah telin medal pahnih - Shoe Making - gold medal leh Floristry - bronze medal an la. Kumin hian trade 16-ah telin gold 3, silver 1 leh Medallion of Excellence(MoE) - 4, a vaiin medal pariat an hawn.
Gold medal hi floristry-ah Maximus Lalruatkima, fashion technology-ah Emily VL Ṭhakimi, shoe making-ah Vanlalbiakdiki ten an la a; Biakdiki hian kum 2022 nen gold medal a lak vawi hnihna a ni. Silver medal latu chu drone film making-ah Anthony Lalchhanhima a ni a, MoE la tute chu - plumbing & heating-ah Liansangrem, electrical installation-ah Lallawmkima, hair dressing-ah Laltlanzovi leh beauty therapy-ah Vanlalhriatchhungi te an ni. MoE Medal hi 1,000 points-a 700 hmu pha chinte hnena pek ṭhin a ni a, world level-ah pawh hlan ṭhin a ni.
Worldskills 2024-ah India aiawhin Mizo 2 kal dawn
Kumin September thlaa Lyon, France-a Worldskills neih turah India aiawhin medal latute aṭangin mi pahnih Maximus Lalruatkima leh Emily VL Ṭhakimi te an kal dawn.
Maximus Lalruatkima, Floristry: Maximus Lalruatkima hi Lalmalsawma leh Laldinmawii te fa neih chhun niin, Dawrpui,Aizawlah an cheng. Tunah hian PUC-ah BA (Public Administration) 3rd semester zirlai a ni. Pangpar khawi hi a talent dawn niin, sorkar leh mimal programme pawimawh leh biak-inahte vawi tam tak a khawi tawh. Kum 2022 Indiaskills-ah khan bronze medal a la tawh a, kuminah gold medal a la a, India aiawha Worldskills Competition tel turin India Boot Camp a zawm dawn a ni.
Emily VL Ṭhakimi, Fashion Technology: Emily VL Ṭhakimi hi D Lalsangzuala leh Melody Vansangpuii te fanu pahnih zinga upa zawk a ni a, Khatlaah an cheng mek. Women Polytechnic-ah Garment Technology a zir mek a, Student’s Union-ah finance secretary a ni mek. A naupan laia PC Girls School-a a kal lai aṭangin thil ṭhui leh design lam a tui em em a, kumin hi Indiaskills Competition-a a tel vawi khatna niin fashion technology trade-ah gold medal a la a, India aiawha Worldskills Competition tel turin India Boot Camp a zawm dawn ta a ni.
Anni bakah hian kum 2022 leh 2024-a shoe making trade-a gold medal latu Vanlalbiakdiki, Sihhmui leh drone film making-a silver medal latu Anthony Lalchhanhima, Khatla te erawh Worldskills-a affiliated trade ni lo Demo-Skills an nih avangin world level-a intihsiakna an hmachhawn dawn lo.