Google Gemini YouTube Music Extension chu tihchhuah a ni ta

Google chuan Android leh desktop user-te tan Google Gemini YouTube Music Extension a tichhuak ta.

Google Gemini hmang hian YouTube Music-a music zawn, play leh control theih a ni ang. Gemini hian Google Assistant-in a tih theih ang a ti thei ve vek a, Pixel device-ah Assistant a thlak thei dawn a ni. A hmangtu chuan Gemini hi an YouTube Music account-ah connect-in, AI chatbox hi YouTube Music aṭang hian an hla duh zawntirin, an play-tir thei nghal a ni. Mahse hemi hmang thei tur chuan user chuan Gemini leh YouTube Music-ah a Google account inang a hman a ngai thung.

He Music Extension hmang tur chuan Gemini Extension-a luh a, scroll thlaka YouTube Music lo awm nen connect mai tur a ni. Gemini hian streaming service leh personal library pawh a en thei vek a ni. Google chuan YouTube Music extension command nan hian English chauh a la theih tih a sawi a, ṭawng dang pawh dah thuai an tum a rinawm. Gemini aṭang hian user chuan pause, resume, play, stop, skip, next, previous leh go back a tih theih vek a, YouTube Music Premium subscribe tan chuan background music playback pawh a tih theih bawk.