Tleua te channa 'Tihpalh' a en theih

YouTube lama KVS channel-a 'Hmanlai Film Dangdai' hmuhnawm leh hlimawm rawn chhawp chhuak ṭhin, Tleua leh a ṭhiante chuan film puitling siamin, 'Tihpalh' film chu nizan khan Lersia Play lamah mipui en theiha dah a ni ta.

'Tihpalh' film director leh script writer hi Tleua tia kan hriat lar, Lalramluaha a ni a, producer hi Ramboss leh Khalthang Arts niin, Lersia Play hi co-producer a ni bawk. Director of photography hi Khaltlang Arts a ni, sound scoring hi LRS Production Studio lam kut chhuak a ni bawk. Ramluaha hi a dangdai hle a, TV lama an show bakah, tuna an film siamah ngei pawh a script hi a hmuna tlachawpa a siam leh, a siam sa pawh han siam danglam chawp a nei fo, mahse, changtute hian hneh takin an chang chhuak thei zel tho a, a tihmuhnawm zualtu pawh a ni fo awm e.

He film hi Tei leh Rama inkara hmangaihna, mahse, thil hriat sual leh chetsual avanga an inkar boruak a derthawn chhoh dan te, a changtunu pa tun hma thil tawnin Tei leh Rama inkar a rawn nghawng dante tarlan a ni.

'Tihpalh' film-a changtute hi 'Hmanlai Film Dangdai'-a kan lo hmelhriat sa; Tleua (Lalramluaha), Sialchangi (Hmingthanmawii), Hauchhumi (Zonuni mimii) leh Darneihpuii (Lalfakawmi) te an ni a, anni bakah F. Zomuankima leh David Lalrintluanga te chuan role pawimawh tak an chang bawk.