Lancy leh Omomi An zai dunna hla thar

Mizo Idol 2013-ah khan an zai dun tawh ṭhin a, mahse khami hnu kha chuan an pa≠hniha hla an sak dun hmuh tur a awm rih lo. Mizo Idol 2013-a pathumna Lancy leh Top 10-a mi Omomi te chuan music video thar an siam a, an pahniha zai dunna a ni a, Idol hnua music video-a an zai dun kan hmuh hmasak ber a ni. Vawiin khan MDM Library-ah an dah a, TV lamah pawh kan hmu chhunzawm ang.

Lancy leh Omomi te hla siam thar hi 'Hlimlai ni' a ni a, lenglawng hla daih a ni. Lancy-i tan tuna mi hi lenglawng hla pahnihna a ni. Mi tam tak chuan Fakna hla sa tur ngar ngara kan ngaih an ni mai thei. Lancy-i hian a hmain lenglawng hla a lo tichhuak tawh a, Ṭhazual chart-ah pawh pakhatna a lo hauh tawh nghe nghe. Omomi pawh hian lenglawng lamah chuan tawnhriat a nei ve tho. 'Lo vul leh rawh' tih hla kha a sa tawh a ni. Omomi music video tih≠chhuah hnuhnung ber chu 'Kraws kawng' tih kha a ni.

Fakna lam hla an sa tam zawk a, tunah lenglawng lam an rawn sak leh chungchangah Lancy-i chuan, "Hla thar, dangdai si, hla hlimawm tak, a entute pawhina an hlimpui a, hmuhnawm an tih tur hla kan duh a, chuvang chuan lenglawng hi kan thlang ta a ni," a ti.

'Hlimlai ni' hla hi Kimtea Varte phuah a ni a, a video pawh a hmuhnawm hmel hle a, a hlim≠awm hmel angin a lang. Lancy-i chuan, "Omomi hi zaipui a nuam ka ti khawp mai. Kan aw a inmil dun hlein ka hria a, aw lian tak kan nei lo ve ve a, kan aw a inpawl nalh viauin ka hria," a ti.

Omomi Khiangte hian a hmain K. Lalrintluanga chu a lo zaipui tawh a, an pahnih hian 'Krista lungpui nghet' tih hla sain, Ṭhazual chart-ah pawh a lo hlawhtling hle tawh ṭhin. Lancy-i hi music video siama a zaipui pahnihna a ni a, ani pawhin Lancy hi a fak khawp mai. "A aw hi a zangkhai a, a hmang thiam khawpin ka hre bawk. A bula zai pawh a nuam ka ti khawp mai," a ti. Omomi bik hian inneih hla lampang music video a siam mek a, a buai deuh avangin duh angin hetiang lamah pawh rilru a siam thei rih lo.