Netflix viewer-te'n thla 6 chhungin darkar tld 90 hun hmang; 'ONE PIECE'-in view mtd 71 a nei tling

Khawvel huapa video streaming service lian, Netflix-ah thla ruk chhungin video enna atan viewer-te'n darkar tluklehdingawn 90 chuang hun an hmang.

Netflix hian an original bakah film an lak chhawn leh television show, genre hrang hrang an pe chhuak a, ṭawng hrang hrangin en theih a ni. Hei vang hian kum 2007-a din, Netflix hi kumin April thlaah khan khawvela video on demand streaming media service zingah subsriber ngah ber a ni tawh a, ram 190 chuangah paid member hi maktaduai 269.6 an awm tawh a ni.

Company-in Engagement Report a tihchhuah thar berah, nikum kum chanve hnu lam, July - December, 2023 khan khawvel puma Netflix en ṭhinte hian streaming platform-a video enna atan hian darkar tld. 90 chuang hun an hmang. Hit show 'The Witcher' leh 'Squid Game' te chuan entu an ngah hle a, hetih lai hian report hun chhunga entu ngah ber chu live-action adaptation 'ONE PIECE' a ni thung a, view mtd. 71.6 zet a nei.

View-tu ngah zual 15 zingah international content lam pawh an lang chho zel a, an zingah hian Germany ("Dear Child"), Spain ("A Perfect Story"), leh Korea ("King the Land") te pawh an tel a ni.