Cannes Film Festival 2024: 'Anora'-in Palm d'Or a dawng

Khawvela film festival ngaihhlut ber, May 14 aṭanga neih ṭan, Cannes Film festival chu Inrinni zan, May 25, 2025 khan zawh fel a ni ta.

77th Cannes Film Festival closing ceremony hi Grand Theatre Lumiere-ah neih a ni a, star larte an inlan ṭha hle. Cannes Film Festival top prize, Palme d'Or chu Sean Baker-a film, 'Anora' chuan a dawng a, he film-ah hian US comedy-drama star Mikey Madison chu Anora-ah hian a chang a ni. Baker-a film hi competition-ah vawi hnih a lanna niin, kum 2021 khan 'Red Rocket' chu competition tel tur hian thlan tel a lo ni tawh a ni. Kum 2011 hnua American filmmaker zingah Cannes top prize dawng leh thei hmasa ber a ni bawk.

Payal Kapadia 'All We Imagine As Light' chu kum 30 chhunga Cannes Competition-a Indian film lang thei hmasa ber niin, Grand Prize a dawng. He film hi Mumbai khawpuia hmeichhe pahnih, kum leh nihna inang lo tak takte chanchin a ni. Best screenplay chu Coralie Fargeat horror film,'The Substance' hnenah hlan a ni bawk. Jury award chu Jacques Audiard 'Emilia Perez'-in a dawng.

Best actress prize chu mi pali hnenah hlan niin, Adriana Paz, Zoe Saldana, Karla Sofia Gascon leh Selena Gomez-te'n an dawng. Best actor award chu Yorgos Lanthimos 'Kinds of Kindness'-a changtu, Jesse Plemon-a'n a dawng bawk a ni. Best director, Portuguese filmmaker, Miguel Gomes chuan a film 'Grand Tour' hmangin a dawng. Iranian director, Mohammad Rasoulof chu a film, 'The Seed of the Sacred Fig' vangin Special Prize hlan a ni.

Camera d’Or prize chu Halfdan Ullman Tondel 'Armand' hnenah hlanin, Special Mention chu Chiang wei Liang leh You Qiao Yin-te film,'Mongrel' hnenah hlan a ni bawk.