Private jet hman nasat vangin Taylor Swift an sel

Taylor Swift chuan a programme neihna hmuna a kal velna atan private jet a hman nasat avangin sawisel a tawk a, BBC nature presenter leh environmental advocate, Chris Packham chuan Swift hnenah a 'travel choice' ngaihtuah ṭha turin a ngen hial.

Hemi hma hian programmer, Jack Sweeney chuan Swift-i'n zin kualna atana private jet a hman dan hi a lo chhut tawh a, nikum 2023 chhung ringawt khan private jet pahnih hmangin mel 178,000 zet a zin kual hman a ni. Hei hian ni khat thila Super Bowl final-a a bialpa, Travis Kelce ṭawiawm tura Tokyo aṭanga Las Vegas a pan leh, Tokyo lama a kir leh nghalna pawh a huam tel a ni. Hetianga a zin kual dan a lo chhuisak avang hian Swift hian Sweeney laka legal action lakah a lo vau tawh a ni. Packham chuan Taylor Swift-i'n environment chungchang lam ngaihtuah lo a, Sweeney khinna a vau zawk chuan a tilawm lo hle tih sawiin, "A dik khawp mai, ka tihdan thlak a ngai a nih hi.. tiin i sawi zawk tur a ni," a ti. Swift chu global climate buaina chhan a ni lo a, mahse, boruak ṭha zawk siamna kawngah midangte entawn tura hma hruaitu tur a ni, tiin hei hian a audience, kum lama naupang zawkte chungah nghawng ṭha tak a nei thei dawn a ni, a ti.