IMF buatsaih: Mt. Tinchinkhang expedition-ah Mizo tlangval

Indian Mountaineering Foundation (IMF) buatsaiha Mt. Tinchinkhang ( 6,010 m) Expedition, Sikkim Himalyan range-a mi hlawhtling taka neih takah Mizo tlangval Mesak Lalruatdika, Tanhril a tel.

He Expedition hi North East mite tana buatsaih niin Arunachal Pradesh, Meghalaya, Mizoram, Nagaland, Sikkim, leh Tripura-a mite thlan khawm an ni. Aizawl Quick Response Team member Mesak Lalruatdika pawh hi Mizoram aṭangin thlan a ni. May 1, 2024 khan Himalayan Centre for Adventure and Eco-Tourism, Chemchey, Sikkim-a flag off in, May 5-ah Base camp an thleng a, May 12 chawhnu dar 1-ah an lawn chhuak a ni. Sherpa leh guide nei loin anmahniin an lawn a, member 10 zinga pariat an lawn chhuak.

Mountaineering Expedition kal tur hian Basic mountaineering Course ni 28 chhung training hautak tak paltlang hnuah Grade A an hmu a, Advance Mountaineering Course ni 28 chhung nei lehin Grade A bawk hmuh a ngai. Mesak Lalruatdika hian Himalayan Mountaineering Institute aṭangin Basic Mountaineering Course a zo a, basic course chiah la kal mah se, training chhunga Best Technical-a thlan a nih avangin IMF lam hian tlang lawnnaah hian an thlang ta tho a ni.