Rock and Roll Hall of Fame ceremony-ah Bruce Springsteen, Miley leh Ringo Starr inlan dawn

Rock and Roll Hall of Fame induction ceremony chu November 7 hian buatsaih a ni dawn a, hripui leng kara buatsaih a nih dawn avangin virtual ceremony-in an chawimawi turte hi an lalut dawn a; he hunah hian milar hrang hrang inlan tur an awm a, chung zingah chuan Bruce Springsteen, Miley Cyrus leh Ringo Starr-te pawh an tel.

A chunga tarlante bakah hian Luke Bryan, Sean “Diddy” Combs, Billy Gibbons, Dave Grohl, Don Henley, Jennifer Hudson, Billy Idol, Iggy Pop, Alicia Keys, Adam Levine, Chris Martin, Lin-Manuel Miranda, Brad Paisley, St. Vincent, Gwen Stefani, Charlize Theron leh Nancy Wilson-te hming pawh tarlanin a awm.

Heng milar tak tak hming tarlante hian eng nge an tih dawn chiah chiang taka tarlan a la ni lo a, zaithiam leh lemchan thiam hming a awm pawlh nawk a, nakinah an thil tih tur chu tarlan thuai a la nih a rinawm. Chutihrual erawh chuan Rock and Roll Hall of Fame Class of 2020-te an chawimawi dawn tih erawh hriat sa a ni thung. Rolling Stone magazine chuan Bruce Springsteen hian Landau chawimawina thu a sawi an ring a, Diddy hian Notorious B.I.G aiawhin thu a sawi an rin thu an tarlang.

Rock and Roll Hall of Fame 2020 induction ceremony hi May 2-a Cleveland Public Hall-a sem tura ruahman a ni a, mahse hripui leng vangin November-a sem tur hian an sawn hla ta a ni. An sawn hlat tirh hi chuan virtual ceremony-a buatsaih an tum lem lo a, mahse hripui lengin ziaawm lam a pan theih tak tak loh avangin July thla khan virtual event-a buatsaih mai turin thutlukna an siam ta a ni.

Hall of Fame President leh CEO ni bawk Joel Peresman chuan thuchhuah a siamah 2020 class of Inductee-te lawmna hunah zaithiam leh milar hrang hrang an tel tur chu chawimawina a nih thu sawiin kumin program chu kum dang ai chuan a danglam dawn ta tih a sawi.

Induction ceremony hi EST-a November 7 Zan dar 8-ah  HBO leh HBO Max-te chuan an pe chhuak dawn a, a ṭum 35-na tur a ni tawh dawn. Nakkum lamah erawh chuan ceremony buatsaih tur hian Cleveland lamah an let leh tawh an beisei.

•    Depeche Mode

•    The Doobie Brothers

•    Whitney Houston

•    Nine Inch Nails

•    The Notorious B.I.G.

•    T. Rex

•    Jon Landau

•    Irving Azoff