Sawmtea music video thar YouTube-ah a awm ta

Sawmtea Chhangte chuan music video thar hmuhnawm tak, mit leh beng titlai tak a tichhuak leh ta a, kar hmasa lamah khan Zonet-ah chuan tihchhuah ni tawhin tunah chuan MDM YouTube channel lama thlira ngaihthlak theihin a dah chhuak leh tawh a ni.

Zai avanga Mizoram chhunga chawimawina hrang hrang dawng kim vek thei Sawmtea music video thar hi 'Lalpa i chawimawi ang' tih niin Sam 34-na behchhana siam a ni a, Tea Boitlung chuan sap hla aṭangin a letling a ni. Music chu Tetea Forte kut chhuak a ni a, recording chu Princeton-ah a ti a, Chiangtea'n videon a siam sak thung.

Music video hi YRC-a Central KṬP ṭawngṭaina in a ni a, a hmun a mawiin Sawmtea zai a nung bawk a music video thlir pawh a manhla hle.

"He video kan buaipuinaah hian Pathian kaihhruaina kan chang nasa em em a , engkim mai hi Lalpan min tihfel sak vek zela, MZU student-te'n min thawhpui bawk a , tisa leh thlarauah kan hlawk takzet a ni. Video shoot pawh kan anglo, Pathian faka kalkhawm, praise & worship hun hmangin kan ti zo veka, shoot chhung hian Pathianin min chenchilh tlat a, atir aṭanga atawp thlenga taksa chetna chang te, Lalpan min khawihte kan awm nual. Ka video shoot tawh zawng zawngah a la ropui ber ka ti," tiin Sawmtea chuan a video thar chungchang hi a sawi. MDM Library-ah a dahlut tawh a, Sawmtea zai ngainatute tan chuan YouTube lama duh hun huna hmeh chhuah theiha a awm ta hi thu lawmawm tak a ni ngei ang.