BTS fan leh politician-te'n BTS sipaia ṭang lo turin an duh
South Korea-a BTS fan leh politician ṭhenkhatte chuan an rama K-pop boy band huhang ngah tak, BTS chu sipai ṭang loa awl tir turin an ram sorkar an ngen.
Pian phunga rualban lohna nei lo mipa tawh phawt chu South Korea-ah hian kum 18-28 inkarah kum 2 chhung vel sipai ṭan tir an ni ṭhin. BTS fan-te chuan BTS member-te hi sipai kal tir loa awl turin emaw an ṭan hun tur tihkhawtlaisak turin emaw an ngen a ni.
Kumin September thla khan Democratic Party member Jeon Yong-gi chuan K-pop star-te chu kum 30 an tlin hma chuan sipaia ṭang lo turin ngenna sorkarah a lo siam tawh bawk a, an vanglai, kum 20-30 inkar an hman chhung hian an career tihkhaihlak theih a nih avangin sorkar hnenah kum 30 an tlin hma chu awl turin a ngen a ni.
Democratic Party senior member Noh Woong-rae pawhin ram tana hnathawh dan a inang lo tih sawiin, "Silai keng vek tur kan ni lo," a ti.
Korea Sorkar hian Tottenham Hotspur forward Son Heung-min chu sipai ṭang lo turin a lo awl tawh a, ani bakah hian classical musician, pianist Seong-Jin cho pawh awl a lo ni tawh bawk. K-pop star-te erawh awl an la ni ngai lo.