Billboard 200 : 'Tortured Poets Department'-in kar 5 chhung hma a hruai ta

Taylor Swift album thar ber, 'The Tortured Poets Department' chuan Billboard 200 album chart-ah a zawnin kar nga chhung hma a hruai ta. Kum 2023-a Morgan Wallen album, 'One Thing at a Time'-in kar 12 chhung hma a hruai hnuah a zawna kar nga chhunga no. 1 ni leh thei hmasa ber a ni.

April 19-a tihchhuah, 'The Tortured Poets Department' hian kar liam ta chhung khan US-ah equivalent album unit 378,000 a neih belh leh a, on-demand official stream mtd 216.9 nei bawkin, traditional album sales 210,000 a nei leh bawk. Taylor Swift hian a album hrang hrang hmangin Billboard 200 chart-a no. 1 a luah hi kar 74 a tling ta a, soloist zingah hetiang dinhmun thleng thei hmasa ber a ni. A dawttu hi Elvis Presley niin, a ni khan kar 67 chhung no. 1 hi a lo hauh tawh.

No. 2-ah Billie Eilish album thar, 'Hit Me Hard and Soft' rawn langin, equivalent album unit 339,000 a nei, a album zinga kar khat chhunga unit nei tam ber a ni. Kum riat chhunga album chart-a no. 1 leh 2-te'n unit 300,000 chuang an neih theih ve ve ṭum khatna a ni bawk. Morgan Wallen 'One Thing at a Time' chuan equivalent album unit 75,000 nei lehin, no. 3-ah a la ding nghet zel. Gunna 'One of Wun' chu no. 2 aṭangin no. 4-ah a tla thla thung a, a kar hnihnaah hian equivalent album unit 56,000 a nei. No. 5-ah Future leh Metro Boomin joint album, 'We Don't Trust You' awmin, equivalent album unit 48,000 an neih belh leh.