Citizenship Amendment Act chungchangah Sorkarin Bollywood-ah lam ṭang a zawng

Citizenship Amendment Act-in sawi a hlawh chho zel. Union Minister Piyush Goyal chuan January 5 zanah Bollywood lama hming langsar deuh deuhte chu dinner turin a sawm khawm a, an sawmnaah chuan, “dialogue over CAA with the government,” tih niin The Hindu chuan a tarlang.

India media langsar tak takte chuan he mi chunchang hi tun hnaiah an tarlang nasa hle a, CAA duh lotu zingah Bollywood star thahnem tak telin an duh lohna an au chhuahpui tawh si a, sorkarin CAA thlawptu tur bollywood star a zawng khawm a, Thawhṭanni (vawiin) lam aṭang chuan Bollywood star zingah CAA thlawpna lan chhuahtirtu an awm nuala rin a ni.

India Today tarlan danin Mumbai-a Grand Hyatt Hotel-ah Bollywood star-te hi zanriah kil tura sawm an ni a, an sawmna lamah hian  Union Minister Piyush Goyal hming hi official taka tarlan ni lo mah se, ani hi a lo dawngsawngtu tur a nih thu an ziak a, hei hi media dangah pawh tarlan a ni.

Pathianni zana an sawm zingah hian  Karan Johar, Kabir Khan, Farhan Akhtar, Ritesh Sidhwani-te chu an tel ngei niin an sawi a; The Hindu tarlan danin a huaihawttu berah film producer Mahaveer Jain an hma theh a, an tum ber erawh chu CAA chungchanga BJP-in lam ṭang an siamna a ni.

CAA duh lo zawng hian Bollywood lama mi eng emaw zat an au chhuak tawh a, chung zingah chuan Anubhav Sinha, Huma Qureshi, Konkona Sen Sharma. Richa Chadha, Anurag Kashyap,  Swara Bhasker, Varun Grover, Vikramaditya Motwane, Anubhav Sinha, Neeraj Ghaywan-te an tel a, heng mite hi Pathianni zana an sawm zingah an tel lo.

Swara Bhaskar phei chuan, "Min sawm ve lo a ni mai lo a, eng thil nge an tih dawn pawh ka hre lo. Bollywood hi sorkar lam ṭang anga lantir a, an thupuangtu anga hman an tumna hmanrua mai mai a ni... mipui duh loh em em  CAA-NPR-NRC hi mipui hmaa mawi taka lantir an tumna hmanrua a ni," tiin a sawisel.