Iron Man 3-a misual tur an thlak

Hemi chanchin ziah hmaa hriat tur pawimawh pakhat chu Marvel kher lo pawh, super hero mo≠vie-te hi naupang inawmlemna tur toy siamtute nen an inthlunzawm hle ṭhin. Marvel movie an buatsaih chhoh mek, Iron Man 3-ah pawh hian toy siamtu company te ṭhat zawkna leh hlawk zawkna turin misual tur an thlak.

Iron Man 3-ah hian misual tura an ruahman hmasak chu Marvel comic-a misual, Maya Hansen kha a ni a, he character hi Rebecca Hall-i'n a chang dawn tih a ni. Mahse toy siamtu lamten misual bera hmeichhia hman a nih chuan toy an siamte hralh chhuah a harsat an hlau a, Marvel hotute chuan an ngaihtuah ṭha leh a, misual ber tur hi an thlak danglam leh.

A script pawh an zo vek tawh a, mahse misual ber tur lem an thlak leh tak avangin a script pawh an siam danglam leh dawn. Misual lema chang tur hi Aldrich Killian kha a ni dawn a, he character-ah hian Guy Pearce a chang dawn a ni.