Angry Birds a hlawhtling

Video game hlawhtling em em Angry Birds aṭanga din chhuaha movie-a siam tak, The Angry Birds Movie chu a hlawhtling reuh hle a, box office-ah pawn pakhatna a rawn hauh nghal pang mai.

Captain America a la hit a, hei bakah hian movie thar eng eng emaw a awm nachungin The Angry Birds Movie a rawn ropui hle. Kar tawp ni thum chhung chauh khan Angry Birds hian USD mtd 39 zet a lalut hman. US bak, ram danga an tihchhuahna aṭangin USD mtd 94 zet a lalut bawk a, hengte nen hian USD mtd 150 vel zet pawisa a huilut tawh a ni.

Captain America: Civil War chu a ropui ngai chuan ropui tawh lo mah se, a la hlawhtling hle tho. A zawna ṭum hnih zet pakhatna a hauh hnuah pahnihnaah a chhuk thla a, a sum lakluh erawh a la tam tham hle tho. Kar tawp ni thum chhung khan USD mtd 33.1 zet a la lakluh belh leh thei a, hengte nen hian North America
aṭang chauha a sum lakluh ringawt pawh hi USD mtd 347.4 a tling tawh. Khawvel pum huapa a sum lakluh chu USD tluklehdingawn khat a tling tawh a, Disney tihchhuah movie, tluklehdingawn lalut tling thei movie 10-na a ni a, movie tihchhuah tawh zawng zawng zingah sum lakluh hnem lamah 19-na a ni ta.

Top 10-a film thar lang zingah Neighbors 2: Sorority Rising chu pathumnaah a lang a, Nice Guys chu palinaah a lang bawk.

Tunkara movie chhuak tur, khawvelin a nghah≠hlelh chu X-Men: Apocalypse hi a ni a, Zirtawpni hian hmun hrang hrangah tihchhuah a ni ang. He movie hian tun kar tawp chhung hian USD mtd 103.3 a hmuh tlin beisei a ni.

Box office movie

"The Angry Birds Movie" - $mtd39

"Captain America: Civil War" - $mtd33.1

"Neighbors 2: Sorority Rising" - $mtd21.8

"The Nice Guys" - $mtd11.3

"The Jungle Book" - $mtd11

"Money Monster" - $mtd7.1

"The Darkness (2016)" - $mtd2.4

"Zootopia" - $mtd1.7

"The Huntsman: Winter's War" - $mtd1.2

"Mother's Day (2016)" - $mtd1.1