Russia-in war-themed comic book a hmang ṭangkai

Russia chuan Ukraine a rûn mekah, sorkar leh sipaite chetna ṭhalaite'n an thlawp theihna turin war-themed comic book a hmang ṭangkai hle.

Kum 2022, February thla khan Russia chuan Ukraine hi a rûn ṭan a, an rûn ṭan tirh lama mipui ngaihdan an lakah, Russia ṭhalai tam zawk chuan indo hi an thlawp lo hle. Hei vang hian ṭhalaite rilru thlakna tur hian, indona hmachhawn mek Russia sipaite fakna leh chawimawina lam lantirna comic book hi an siam ta a ni.

April thla khan Russia Defence leh Education Ministry-te chuan Ukraine an rûn chungchanga an sorkar leh sipaite chet dan fakna comic book sing tel chu an ram chhung leh, Ukraine ram an luaha school hrang hrangah an thehdarh. Russia awpna hnuaia awm sikul zawng zawngah heng comics hi sem vek an tum.

Sikula an sem chhuah comic book-ah hian short story 22 awmin, Ukraine an rûnna chhan chu Ukraine-in a ram khawchhak lama insuatna rapthlak tak kalpui a tum danna tur niin an tarlang. Short story-a changtu zingah hian Ukraine-a Bucha khaw beihnaa a hotu, commanding officer; Col-Gen Azatbek Omurbekov pawh telin, 'real man' tia sawi a ni. Lehkhabu an sema thawnthute hi Russian children's author, Oleg Roy ziah a ni a, ani hi Ukraine rûn thlawptu langsar tak a ni.

Nikum September thla khan war-themed comics series 23 chu military blogger, Mikhail Zvinchuk chuan a lo tichhuak tawh bawk a, heng comics-te hi English, Arabic leh Chinese-in an let bawk. Russia sipaite tumruhna leh huaisenziate tarlangin, Ukraine sipaite chu khawthlang ramte'n an duh duha an hman ṭangkai mai mai niin an tarlang bawk.