GPYD Bible Quiz-ah Salem Veng PYD an thiam ber

Mizoram UPC kohhran ṭhalai pawl, General Pentecostal Youth Department buatsaih GPYD Bible Quiz chu Zirtawpni zan khan zawh a ni ta a, final-ah Salem Veng PYD chuan Durtlang Mel-5 PYD hnehin, lawmman pakhatna an dawng.

Bible Quiz final-ah hian round paruk hmanga inelna neih niin, zawhna leh chhanna, a karawl dah khah, tu sawi leh tu hnena sawi nge, rapid fire round, bung leh chang inhriatsiak, optional round hmangtea inelna neih a ni. Final-ah hian Salem PYD aiawha tel Laldinmawia leh Lalhruaikima te'n point 170 hmuin, a tir lama che ṭha lo Durtlang Mel-5 PYD aiawh Lalchhanmawii leh Lallianmawii te rapid fire round-ah che ṭha viau mah se, point 135 hmuin, Salem PYD an lehthal zo ta lo.

General PYD, Mizoram UPC chuan Bible Quiz hi kum tin a buatsaih ṭhin a, tun ṭumah hian Emilia Lalnunpuii chu host niin, Lalnunmawii chu Quiz Master a ni. Final hi Mizoram UPC general superintendent Rev. P. Lalrinawma chuan a hmanpui a ni.

GPYD Bible Quiz hi May 2, Ningani zan aṭang khan inelna nei ṭanin, prelims, round of 16, quarterfinal, semifinal leh final-ahte Exodus, Rom, Ezekiela, Hebrai, Estheri, Chanchinṭha Johana ziak, Thuhriltu, Petera I & II, Roreltu leh Tirhkohte Thiltih hmanga inelna neih a ni.