Billboard 21 under 21 ranking a chhuak

Billboard magazine chuan musician zinga kum 21 hnuai lam, khawvel huapa thawm nei lian leh kum khat dang lo awm leh tur pawha boruak nei lian chho zel tura ngaih mi 21, Billboard 21 under 21, 2024 ranking chu US time-a May 31 khan a tichhuak leh ta.

American music magazine, Billboard hian Billboard 21 under 21 ranking hi kum 2010 aṭang khan a siam ṭan a ni. Musician naupang, kum 21 hnuai lam zinga boruak nei lian tak, thla 12 dang lo awm turah pawh thawm nei lian chho tur nia ngaihte a thlang chhuak ṭhin. Ranking hi an album leh hla sales neih zat, streaming neih zat bakah, music industry-a boruak an neih len dan aṭangin an siam a ni.

Ranking siam hmasak ber, kum 2010 khan kum 20 mi niin Taylor Swift chu no. 1-ah a awm. Justin Bieber chu 2011 ah, 2014-ah Lorde leh, 2019-ah Billie Eilish te no. 1-ah an lang bawk a, an top kum hian kum 17 mi vek an ni. Hetih lai hian ranking-a lang pha zingah Willow Smith chu a naupang ber a, kum 2010-ah kum 9 mi niin a lang. Justin Bieber, Camila Cabello, Billie Eilish, Lorde, Shawn Mendes, Willow Smith leh Grace VanderWaal te chu ranking-a lang ngun ber niin, vawi nga ṭheuh an lang bawk.