'All Eyes on Rafah' share-tu Bollywood star-te an troll ; “But no eyes on Manipur"

Gaza Strip-a Israel leh Palestinian firfiak pawl, Hamas-te indona thleng mekah, Palestinian lam thlawptute'n Rafah khawpuia Israel chet dan an demna leh, Palestinian mite an thlawpna lantirna atan 'All Eyes on Rafah' tih campaign neiin, social media lamah thlalak pawh an vawrh darh nasa hle. He thlalak hi celebrity tam takin share-in a viral zui nghal.

'All Eyes on Rafah' thlalak hi Bollywood star eng emaw zatin an share ve bawk a, mahse, netizen lamin sawiselin an troll zui nghal. AI-generated image share-tu zingah hian Priyanka Chopra, Alia Bhatt, Richa Chadha, Varun Dhawan, leh Samantha Ruth Prabhu-te pawh an tel. Netizen-te chuan India ram chhung ngei, Manipur-ah kum khat chuang tualchhung buaina chhuak avanga mi tam tak tawrhna thleng chungchangah Bollywood star-te an ṭawngchhuak duh lo a, Manipur lam chanchin an ngaihven duh lo laia Palestinian-te tana an ṭawngchhuak leh si hi an rilru a tina hle a, internet lamah an troll zui ta a ni. Bollywood star-te kah letna atan hian “But no eyes on Manipur" tih chu India rama social media hmangtute'n an rawn thehdarh zui ve a ni.