BBC Radio 2-ah Pet Shop Boys leh Sting

Kumin September thlaa Radio 2 festival neih turah English synth-pop duo, Pet Shop Boys leh Sting-te chu headliner an ni dawn. He festival-ah hian Manic Street Preachers, Sugababes, Craig David, Snow Patrol, Travis leh Sister Sledge-te pawh an perform dawn bawk.

Radio 2 festival hi September 7-8 hian Preston-a Moor Park-ah neih a ni dawn a, Pet Shop Boys hian he festival an headline ṭum hnihna tur a ni a, kum nga liam taa Hyde Park, London-a neih ṭum khan an lo headline tawh bawk. Kumin festival-ah Dreamworld tour an neih meka an hit, Suburbia, Rent, Left To My Own Devices leh It's A Sin-te an rawn sa dawn a, Pathianni zanah festival hi an rawn khar dawn a ni. Special guest pawh neih an tum a, an mahse an la inbe fel chiah lo. Sting pawh a trio thar, Sting 3.0 tihte nen an rawn perform dawn bawk. A a hla sak tur zingah hian Roxanne, Message in a Bottle leh Every Little Thing She Does is Magic te a tel dawn tih a sawi lawk.