ṬHAZUAL LENGZEM: Chart No.1 dinhmun Jaui'n 'I Tan Chauh' a la hauh zel e

Zonet Lengzem chart-ah Jaui 'I Tan Chauh' khum zo an la awm lo a, Manuna 'Vawng reng nang e' chu pahnihna niin Awmtea Polymer 'I Phone kha la rawh' chu pathumna a ni.

Bike-a chuan paha an video shoot background music-ah 'I Tan Chauh' hman tur emaw ti deuh tlat an awm ta nual, chu chu Instagram lama Jaui follow-tute chuan an hrethiam ang.  

Hope Music Production kut chhuak Jaui 'I Tan Chauh' chu Ṭhazual Lengzem chart-ah a zawnin No.1 a ni ta a, chart lehah a la ni leh dawn em tih hriat a chakawm tawh hle. Jaui hla 'hit' hian YouTube-ah thlirtu nuai thum dawn a nei tawh a, a hla mawi piah lamah Jaui chevel thlir ning lo an tam a ni ngei ang. 

'I Tan Chauh' live version hi Zonet YouTube channel lamah pawh thlir duh tan chuan a awm bawk a, live music ngainatute tan chuan hmaih phal chi a ni lo.

Ṭhazual chart-a che ṭha ṭhin tak Manuna chuan 'Vawng reng nang e' chu pahnihna a nihpui leh a, chart hmasaa a dinhmun ngaiah bawk a ding leh. Chart lehah hma a sawn dawn em tih hriat a chakawm tawh a, pakhatna a nih pawhin a mak lo hle ang.

Awmtea Polymer 'I Phone kha la rawh' chu pangana aṭangin pathumnaah a rawn invawrh a, Rebecca Saimawii 'Ka lung damna' phei chu a invawrh nasa hle a, 10-na aṭangin number tam tak zuan khumin palinaah a rawn innghat a ni.

F. Zomuanpuia ft. Sangsangi Bawitlung 'Hmana kan nun hlui' chu pangana a ni bawk.

Ṭhazual Lengzem chart top 10-a langte hi an ṭha tlang hle a, nakin lawka No.1 dinhmun luah phu ṭhiau an awm. Chung zingah chuan Dji, KimKima leh Rpa Ralte te pawh an tel.