The Voice-a thiam ber Alisan Porter

US TV show hit, The Voice chu Thawhlehni zan khan final neih a ni a, hetah hian Alisan Porter chu thiam bera thlan a ni. Alison Porter hi Christina Aguilera team-a mi a ni a, The Voice intihsiaka hmeichhe team aṭanga pakhatna awm chhun a la ni.

Porter hi kum 1991 khan Curly Sue film a lo chang tawh a, tunah hian fa pahnih nei tawhin, pasal a nei tawh a, a pasal hian fa pakhat a nei bawk. A nun kal tawhah harsatna hrang hrang a tawk tawh a, ruihhlo ngaiin hunrei tak chu bansan tumin a lo bei tawh ṭhin a, a hlawhtling a, a hringnun kalkawngah pawh hlawhtlinna a chhar ta a ni. Porter chuan, "Curly Sue ka chawlhsan tawh a, tunah chuan The Voice winner ka ni ta. Kum 30 vel zet chu ka lo nghak tawh a ni," a ti. Tunah hian kum 34 mi a ni.

A ruihhlo leh zu lo tih tawh ṭhinte sawi chhuakin, "Khatiang hunlai anga ka kir leh loh nan ni tin hian theihtawp ka chhuah reng a, hmalam pan ka tum lui tlat a ni. Hetilai hmuna ka awm thei hi malsawmna ropui tak niin ka hria a, tuna ka thil tih lai hi a nuam ka ti a ni," a ti.

Result puan zanah hian CeeLo Green, Ariana Grande, Sia, Little Big Town, Jennier Nettles, Alison Krauss, Joe Walsh leh Zayn Malik te an zai.