Despacito-in YouTube-a thlirtu tld 7 chuang nei tawh

Kum 2017 January thlaa tihchhuah Puerto Rican artist pahnih, Luis Fonsi leh rapper Daddy Yankee-te hla 'Despacito' chu YouTube-a thlirtu (viewer) ngah ber a ni a, mi tluklehdingawn 7 chuangin an thlir tawh.

He hla hi RIAA chuan certified diamond a pe tawh a, Billboard Hot 100-ah kar 16 chhung chu pakhatna a ni tawh bawk. Argentina leh Japan top chart-ah te pawh pakhatna lo ni tawhin, Latin Grammy Awards 2018-ah award pali lai a la tawh bawk a, heng zingah hian Record Of The Year a la tel bawk.

He hla an tihchhuah kum, kum 2017 April thla khan tunlai ṭhangthar zinga music lama huhang ngah ber pawl, Justin Bieber chuan remix version a tichhuak a, sap hlain a ni hian a rawn sa thung. Hetih hun lai hi Justin hian a album 'Purpose' a lar pui vanglai a nih bakah kum li dawn album a neih tawh loh hnuaa rimawi khawvela huhang lian tak a rawn neih lehna a ni ve bawk nen, Despacito ti lar zualtu zingah a tel pawh a tih theih hial ang.

Khawvelah hian mihring tluklehdingawn 7 chuang kan awm niin mithiamte chuan an sawi a, chutiang a nih chuan Despacito hla hi khawvel mipui tam zawkin an hriat a rinawm.