Britain-a hausa ber 10 zingah India mi a lang

The Sunday Times-in Britain-a mi hausa zual 20 hming a tarlanah India khua leh tui nei mi pahnih an awm a, top 10-ah pakhat zawk hi a lang pha.

Sunday Times Rich List 2016-ah hian Property leh Internet aṭanga hlawhtling, David leh Simon Reuben te unau hi hausa ber an ni a, British khua leh tui an ni. An hausakna hi £tld 13.1 zet a ni a, nikum kha chuan £tld 9.7 nei anga tarlan an ni a, an hausakna hi a pung hle. Forbes chanchinbuin kum 2013-a UK mi hausa a tarlanah khan pahnihna an ni a, nikuma The Sunday Times-in a tar chhuahah kha chuan pangana an ni. An hausakna chhan hi real estate leh internet lam thil bakah, thir lam chi hmanga an sumdawnna
aṭangin a ni. Kum 1990 chho
aṭang khan Russia ramah thir (metal) lam chi hmanga sumdawnnaah an inhnamhnawih ṭan a, hei bakah an sumdawnna huang hi zauh zelin, Morocco lamah chuan thil laih≠chhuah lamah thleng an sumdawnna hi an zauh tawh a ni.

Hausa ber dawttua tar chhuah hi India khua leh tui, Hinduja Group neitute - Srichand leh Gopichand te unau hi a ni. A tir chuan India
aṭanga bul ṭan an ni a, kum 1979 aṭang khan an hmunpui ber hi London-ah an sawn a, an sumdawnna hi an zauh zel a ni. Hinduja Group hnuaiah hian coporation tam tak a awm a, chung zingah chuan Ashok Leyland te, IndusInd Bank te hi Mizoram thlenga kan hriat lar a ni. Gulf Oil Coporation Ltd pawh hi he Group hnuaia mi tho a ni. He mite unau hausakna hi £tld 13 zet a ni a, nikuma rich list tihchhuahah pawh pahnih tho an ni.

UK-a mi hausa pathumna hi Juda pa, Ukraine-a piang, US khua leh tui, London-a khawsa mek, Leo≠nard Blavatnik a ni a, investor a ni a, philanthropist langsar a ni bawk. A hausakna hi £tld 11.590 zet a ni a, nikum kha chuan pakhatna a ni a, pathumnaah a tla thla ta a ni.

Palinaah hian Canada khua leh tui, London-a khawsa, Galen Weston leh George G. Weston te an ni. An hausakna hi £tld 11 a ni a, nikumah pawh palina an ni. Galen Weston hi Businessman a ni a, philanthropist langsar tak a ni bawk. Forbes chanchinbu chuan kum 2014 khan khawvela hausa a thlan chhuahah 147-naah a hming a lang. George G. Weston hi Associated British Foods-a an CEO a ni, a hlawh bik chauh hi kum khatah £mtd 7.15 a ni.

Ernesto leh Kirsty Bertarelli te nupa hi hausak lamah pangana an ni a, Switzerland leh United Kingdom khua leh tui nei an ni a, damdawi siam chhuah lam hi an eizawnna a ni. £tld 9.780 zet an nei a, nikum khan paruknaah an lang.

Hausa thlan chhuah 20 zingah hian Lakshmi Mittal hi India khua leh tui a ni a, 11-naah a lang pha a, Chelsea neitupa, Russian pa hausa, Roman Abramovich chu 13-na a ni.