Box Office: 'The Garfield Movie' in hma hruai ve ta

Kar liam taa North American box office lam thawm zawi tak karah, USD mtd 14 la luttu 'The Garfield Movie' chuan hma a rawn hruai ve ta.

A kar hnihnaah 'The Garfield Movie' entu hi 42% in tlahniam mah se, boruak nei lian dang an awm loh avangin No 1-ah a awm thei ta tho a ni. Rotten Tomatoes lamah pawh approval rating a hmu ṭha lem lo a, 36% niin audience lam erawh chuan 81% Score an pe a, CinemaScore survey-ah B+ grade a hmu bawk. Animated film hian North America-ah USD mtd 51.57 la lut tawhin, khawvel huapa a sum hmuh chu USD mtd 152.2 a tling tawh.

'Furiosa : A Mad Max Saga' chu a tlahniam chak hle, No 3-ah awmin, USD mtd 10.7 chauh a hmuh belh leh. Domestic-a a sum hmuh hi USD mtd 49.7 niin, international-ah USD mtd 114.4 a hmu tawh a, mahse a budget USD mtd 168 erawh a la tuak chhuak zo chuang lo.

Ryan Reynolds channa, 'IF' chu a kar thumnaah No 2-ah a rawn chho leh a, USD mtd 10.8 a hmuh belh leh. 'Kingdom of the Planet of the Apes' pawh a la che ṭha viau a, No 4-ah awmin, USD mtd 8.8 a lak luh belh nen, a sum hmuh hi USD mtd 300 a tling tawh. 'The Fall Guy' chuan USD mtd 4.2 hmuh belhin, Top 5 a rawn khar ve bawk.