Lersia Play: 'Kan chhungkua' in entu ngah ber

Movie screaming app, Lersia Play-ah May thla chhungin 'Kan chhungkua' film chuan entu a ngah ber.

In-House production kut chhuak, 'Kan chhungkua' hi May 11, 2024 khan Lersia Play-ah hian chhawp chhuah a ni a, director Drew Pachuau niin, script hi Samual Pachuau ziah a ni. Mizo chhungkaw pakhat, member mize hrang hrang te chungchang, Mizo pa ve tak maiin nu tel loa a fate pathum a enkawl dan chanchin a ni. Chhungkaw pawimawhna a pho lang a, chhungkuaa en him a nih bakah, hlimawm lam pawh a tam. Tommy (Lil Toto) leh Maruata-ten lead role an chang a, In-House film danga kan hmuh tawh, Mawma leh Olivia te pawh an chang bawk.

May thla chhunga Lersia Play aṭanga film hralh chhuah tam pahnihna chu May 3-a tlangzarh, 'Keimah Thingtlang Nula' a ni. Osiama Pictures Production siam niin, YouTube lama thawnthu lar leh lawm hlawh tak, Angels Pops ziah behchhana siam a ni. Royte Business in produce-in, director hi J.S. Tharmawia a ni a, director of photography C. Lalliansiama a ni. Thingtlang khaw pakhata thil thleng hlimawm leh lungchhiatthlak tak kara ṭhian inhmangaihna leh duhamna inbuk tawnna lamte a ni.

April thla film hralh chhuah tam ber, 'Dak Pu' chu May thlaah No 3-ah a lang pha bawk. April 26-a tlangzarh, 'Dak Pu'-ah hian Mizo lemchan thiam kan neih ṭhat zinga mi - Alex, Adama, Hruaia Sailo, Ms-i, Sangtei Renza, Maruata Rawite leh Joe-te an chang. Director hi V. Zochhuanmawia niin, Chiangtea Videography kut chhuak a ni a, script pawh hi Chiangtea ziah a ni bawk.

Lersia Play-in May thla chhung film a hralh chhuah tam zual zingah hian May 9-a tlangzarh, 'Zu Zuar Fanu' leh May 24-a tlangzarh 'Tihpalh' chu Top 5-ah an lang bawk a ni.