Simon Cowell-a'n boy band din leh a tum

Kum 2010 khan The X Factor UK kaltlangin boy band, One Direction din a ni a, khawvel huapin an larin an hlawhtling zui hle. X Factor judge, Simon Cowell chuan boy band dang din leh tumin audition a buatsaih leh dawn.

Audition an buatsaih tur hi Box to Box Films in a produce dawn a, an buaipui chhoh dante pawh documentary series atan an record vek dawn a ni. July thla aṭangin audition hi England-ah neih a ni dawn a, Newcastle, Dublin, Liverpool leh London-ah an nei ang. Boy band thar din an tum chungchangah Cowell chuan, "Generation tinte hian megastar boyband neih zel hi an phu a, One Direction dinna pawh kum 14 chuang ni tawhin, anni anga rawn hlawhtling chho hi an awm leh tawh rih loin ka hria. Industry hian solo artist lam hi a thlurbing a, hei vang hian pawn lam miin group siam tura hma lak hi a ngai ṭhin," a ti.