'1999 Hiraeth' a chhuak dawn ta

Mizo film zinga genre danglam, black comedy leh Christian mystery kaihkawp; '1999 Hiraeth' chu zanin hian Vanapa Hall-ah premiere a ni dawn ta. Zanin vek hian Lersia Play-ah en theihin dah a ni nghal bawk ang.

'1999 Hireath' (HEER-eyeth tiha lam tur) hi Ramfangzauva'n a nuna duhthlanna a siam hmanga a tum leh beisei dan ang ni loa a bul hnai leh a chhehvela awm zawng zawngte nun a nghawng tel dan hmuhnawm tak mai a ni. Raymond Colney ziah leh direct a ni a, co-writer hi Zoparmawii, Green Rocket TV-a Zopari kha a ni. Raymond Colney hian '0389' pawh a lo siam tawh a, Green Rocket TV nena thawk hoin 'Rawng chawhpawlh' an lo siam tawh bawk.

A changtute pawh hi an hraw hlawm hle. Mizo ṭhalaite lawm, Green Rocket TV-a Zopari, Mizo film-a sulhnu nei ṭha leh lar, Rosangpuii (Rspi) leh Papuia Pachuau, tunlai Mizo hmeichhe zaithiam lar Mary Dawngi leh Miss Mizoram pawh lo ni tawh, Zirsangpuii te an ni.

Vanapa Hall-a en duh tan ticket hi Rs 150-in Brighter co. leh Triket.in aṭangin a lei theih a, Lersia Play-a en duh tan pawh ticket hi lei theih a ni ang.

Lersia Play hian ticket system thar an duang a, ticket-ah hian QR code dahin, hei hi phone-a Lersia Play application aṭanga scan-in movie hi a en theih a ni. Lersia Play ticket hi kohhran ṭhalai leh YMA, pawl anga sum tuak nana hmang duhte tan zawrh theih a ni bawk. Lersia Play ah emaw, movie director-te emaw biak mai tur a ni.