Zo Inspiration Foundation-in an kum 4 tlin an lawm

Mi harsa zawkte ṭanpuina atana kawng hrang hranga hma la ṭhin, Zo Inspiration Foundation chuan Inrinni, June 7,2024 khan Music Home, Zonuam-ah an kum li tlin lawmna hun an hmang.

He hun hi Education Minister Dr Vanlalthlana'n a hmanpui a, Pathian fak leh chawimawina hun hman a nih bakah, an hmalaknaa boral tawh ṭhenkhatte sunna hun hmangin, hriatrengna thilpek an hlan bawk.

Zo Inspiration Foundation hi Covid-19 hripui len lai, kum 2020, June 7 khan Emmanuel Thangrosanga'n bul a ṭan a, Covid hri len lai khan chhungkaw harsa 234-te hnenah thilpek an sem chhuak a ni. Vawiin thlengin vehbur hi vawi 76 khawn tawhin, an vehbur khawn kaltlanga an thilpek sem chhuah tawh hi Rs 2,61,80,404 a tling tawh. An rawngbawlna kaltlang hian mi harsa chenna in 18 leh ei chawp dawr 13 sak a ni tawh a, tunah hian naupang harsa zawk 25-te zirna senso an tumsak mek bawk. Registered Society niin Ramhlun Venglai-ah Office an nei a, nitin mi harsa te len luh nan an in hawng ṭhin a ni.