Khiangte Construction Ṭhazual Gospel: Vohbik an rawn lang leh ta

Khiangte Construction Ṭhazual Gospel-ah chuai thei lo, Vohbik an rawn lang leh ta a, an hla thar 'Engmahlo Mai' tih hmangin chart-ah hma an rawn hruai leh ta.

Vohbik group zaithiam leh an zai ngaihnawm ṭhin zia kan la hre hlawm awm e, pasal neia hmun hrang hranga an awm tak avangin an vanglai angin rimawi khawvel lamah 'active' lutuk thei tawh lo mah se, an thiamzia an rawn lantir thar leh ṭhin. An group hi kum 2002, June thlaa din kha niin, a tirah member 4 an ni a, 2005 aṭangin member panga an ni. Kum 2003-ah album pahnih, 'Hossana' leh Krismas album 'Emmanuel' an ti chhuak a, 2006-ah 'Hmangaihna' ti chhuak lehin, hun eng emaw chen an thawm a reh hnuah 2015-ah inko khawm lehin 'Halleluia' album an ti chhuak leh a ni. 'Engmah lo Mai' tih hla hi Bible thu lak chhuah niin, April 17 khan an group YouTube channel-ah an dah chhuak a ni.

Lawmi Khiangte chuan 'A chhawk duh che' tih hmangin chart-ah No 2 a rawn hauh a, Cindy leh Puipuia-a te hla, 'Kan phal thei lo' tih chu No 3-ah a awm bawk. Thlifim 'Malsawmin awm se' pawh No 4-ah la awm chhunzawm zelin, Tumtumi 'Ka inchhuang ṭhin' tihte chu Top 5-ah an rawn lang ve thung.

Ṭhazual Gospel chart tharah Vanlalruati, Grace Gospel Artiste, Ellebeth-i, Divine Voice leh Angela Lalremruati-te chu Top 10-ah kan hmu bawk a ni.