Thirsakawra India fan chhuah tum - Lza'n km. 10,287.56 a tlân tawh

Thirsakawr hmanga India ram fan chhuah tuma kal mek, Vanlallawmzuala Varte (Lza) s/o VL Chhuanawma, Mission Veng chuan June 9, Pathianni zan khan New Delhi a thleng a, km. 10,287.56-a thui tlan tawhin, kum 6,000 chuang tlan tur a la nei.

Lza hian January 25, 2024 khan Aizawl a chhuahsan a, state 18 - Tripura, Assam, Meghalaya, Bihar, Jharkhand, West Bengal, Odisha, Chhatisgarh, Telangana, Andhra Pradesh, Tamil Nadu, Karnataka, Kerala, Maharashtra, Goa, Maharashtra, Gujarat, Madhya Pradesh leh Rajasthan-te bakah, union territory pakhat Puducherry a paltlang tawh. India chhim tàwp - Kanyakumari thlengin a tlan tawh a, chuta ṭang chuan hmar lam a pan leh a ni.

Lza hi Aizawl a chhuahsan aṭangin ni 139 a thang tawh a, ni 108 tlanin, a bak ni 31 chu chawlh hahdam nan a hmang thung. A tlan tawh chinah a thirsakawr ke vawi 17 vel a thêp tawh.

A kalna khaw hrang hrangah Mizote bakah pollution control board lamin lo dawngsawngin, a pualin hun an lo buatsaih ṭhin. Pathianni zanah pawh khan Delhi-a Mizo welfare leh zirlai pawlte'n Mizoram House, Vasant Vihar-ah lo hmuakin, a lawmna inkhawm an buatsaih a, Mizo ṭhahnem tak an tel.

Delhi-ah hian ni 10 vel a chám dawn a, chumi hnuah Chandigarh a pan leh dawn a, hmar lama union territory hmâwrtawng ber Ladakh-a Leh a thlen hnuah hmarchhak state panin a rawn let leh ang.

Lza All India Cycling Tour hi boruak ṭha leh thianghlim a awm theihna tura mipui zirtirna atan a ni a, 'Ride to clean air’ tih hming vuah niin, 'Clean & Green Sustainable Lifestyle Under Mission Life’ hnuaiah MPCB bultuma neih a ni.