Box Office: Will Smith comeback-na 'Bad Boys: Ride Or Die' a hit

North American box office-ah film chhuak thar tur zinga nghahhlelhawm tak, Will Smith comeback-na 'Bad Boys : Ride or Die' chu beisei lawk ang ngeiin a rawn hit a, No 1-ah a rawn lang nghal.

'Bad Boys' forth installment hian tlangzarh karah North America-ah USD mtd 56 la lutin, international-ah USD mtd 104.6 a hmu chhuak bawk. Kum 2022 Oscars Awards-a Will Smith chet dan mawi lo tak khan a career pawh a nghawng phah hial rin a nih laiin, mipuiin screen lama a che vel hmuh an lo la chak reng tih a rawn lang ta a ni.

Will Smith hian box office-ah No 1 ni thei film 15 a neihna a ni a, classic buddy-cop action comedy hian CinemaScore-ah A-minus hmuin, Rotten Tomatoes-ah audience score 97% a hmu bawk.

No 2-ah 'The Garfield Movie' a tla thla a, USD mtd 10 hmuh belh lehin, a sum hmuh chhuah hi USD mtd 70 dawn a tling tawh. International-ah USD mtd 124 a la lut tawh bawk a ni. 'IF' chu No 3-ah la awmin, USD mtd 8 a lak luh belh a, No 4-ah newcomer 'The Watchers' a rawn lang a, 'Kingdom of the Planet of the Apes' chuan USD mtd 5.4 hmuh belh lehin Top 5 a la luah bawk a ni.