Hillary Scott -A hla 'Thy Will' a phuah chhan a sawi

Lady Antebellum aṭanga khawvelin a hriat lar, Hillary Scott chuan a album thar tur 'Love Remains'-a hla awm tur, 'Thy Will' a phuah chhan a sawi chhuak a, "He hla hi Pathian hnena ka lehkhathawn' a ni a ti.

'Thy Will' hi 'Love Remains' album aṭanga hla mal a tihchhuah hmasak ber a ni a, Hillary Scott chuan he hla hi Pathian hnena a dilna thlen, a lehkhathawn a nih thu a sawi. "'Thy Will' hla hi i tana dah chhuah hmasak bera ka duh a ni. He hla hi tunhnai lawka ka thil tawn, ka thinlung tikehsawmtu thil ka tawn aṭanga ka phuah a ni. Hun harsa ka paltlang tawh zinga harsa ka tih ber ber te ka tawn aṭanga ka phuah a ni," a ti.

"He hla hi Pathian hnena ka lehkhathawn a ni. Zawhna harsa tak ka zawt a, ka nunah hian ka hmuh lawk theih loh thil thleng tam tak a awm a, chutichung chuan thudik chu ka vuan tlat a ni. Amah chu rin tlat ka tum a, amah chu ka thlang tlat a ni," a ti. Harsatna tawk mah se, 'I thu nise' tih theih tlat a pawimawhzia a sawi a, harsatna leh manganna hringnuna lo thleng karah pawh Pathian chu rin a, ama lam hawi tlat chu thil pawimawh a ni tih a sawi chhuak a ni.

Scott hian Fakna album a tichhuak chu ama nihna dik tak tarlan a duh vang a ni tih a sawi. A hla tam tak chu a nun chhung hrehawmna a ṭha chhuahna hla a ni. "Heng hlate leh hla tam tak chu ka thinlung rum ri rawn chhuak a ni. Ka nun chhung hian hetiang hla hi ka sa ṭhin a; biak inah a ni emaw, ka chhungte leh ṭhiante nen emaw...ka ngainat leh hmangaih tak, thi mai tur kut vuan chungin emaw pawn ka sa ṭhin a, ka sa fo dawn a ni," a ti.

Hillary Scott hian Gospel album tichhuak turin a inbuatsaih mek reng a, a album tur hming hi 'Love Remains by Hillary Scott & The Scott Family' tih a ni. He album-ah hian a nu leh pa - Lang Scott leh Linda Davis te bakah, a laizawn, a nau, Rylee Scott te pawh an zai.