The War with Grandpa-in US mipui a tihlim Tenet nek chhuahin a awm ta
US Box Office-ah The War with Grandpa hralh a kal ber a, hun rei tak chhung roreltu Tenet chu pahnihna niin Hocus Pocus (2020 Re-release) chu pathumna a ni.
The War with Grandpa-in US mipui a tihlim
American family comedy film, Tim Hill-a direct The War with Grandpa chu Zirtawpni liam ta khan US-ah tlangzarh a ni a, a hit nghal hle. Hripui leng karah US mipui a chawk hlim a, kartawp liam taah khan US-a theatre 2,250-ah tihchhuah niin $3,620,990 a lalut nghal.
The War with Grandpa hi $mtd 24 lai senga an siam a ni a, hripui leng kara tlangzarh mah ni se mipuiin an hlut hle a, hun rei tak chhung chart thununtu Tenet a rawn nek chhuak ta a ni. A changtute pawh an ṭha hle a, Robert De Niro, Uma Thurman, Rob Riggle leh Christopher Walken-te an ni nawk. US-a tlangzarh a nih hma hian ram dangah tlangzarh hmasak a ni a, ram hrang hrang aṭangin $mtd 5.3 a lalut tawh.
Tenet nek chhuahin a awm ta
Christopher Nolan-a film Tenet chu hun rei tak chart roreltu a nih hnuah The War with Grandpa hian a rawn nek chhuak ta a, ngam loh a tawng ta a ni. Hetichung hian kar tawpah khan theatre 2,215 aṭangin $2,100,000 a la lalut tho.
Hocus Pocus (2020 Re-release) chu pathumna niin theatre 2,113-ah chhuah a ni a, sum $1,161,000 a lalut a ni.
Coco a rawn lang hlawl
US Box Office kar tawp chart-ah hian Coco a rawn lang hlawl. Coco hi kum 2017 chho vela tlangzarh kha a ni tawh a, kar tawpah khan theatre 1,663-ah tihchhuah niin $210,000 a lalut a, parukna a ni.
The New Mutants chu palina ni thungin Unhinged chu pangana a ni bawk. The War with Grandpa bakah hian Top 10-ah film thar dang pakhat a awm a, chu chu Yellow Rose niin pariatna a ni.