K Hminga 'Zân Zâi Ri' ngaithla rawh le

Zalenna film en tawhte chuan 'Zân Zâi Ri' hla hi an hre tawh ngei ang a, YouTube lamah pawh Zalenna film-a Jeremy (Stacy's Penitence) sak chu ngaihthlak tur a awm a, mahse tawite bak ngaihthlak tur a awm lo thung.  

Tunah erawh a hla phuahtu, ṭhangthar hlaphuah thiam zinga a 'ber' huanga dah ngam leh tunlaia huhang ngah tak K Hminga sak ngei ngaihthlak tur a awm ta a, Thawhṭanni zanah khan YouTube-ah music video tichhuakin ngaihthlak a hlawh nghal hle. Darkar 14 chhungin mi sing thum chuangin an thlir hman a, K Hminga zai ngainatu an tam tih a hriat.

Thlasik boruak inṭham chho vel nen K Hminga hla thar hi a inhmeh hle a, a zai ngainatute tan chuan ngaihven ran chi a ni ang. Zana tlangval lunglengin ṭingṭang nena thla eng hnuaia lunglen hnemna atana an la sak duh tur chi ni ngeiin a lang bawk.

Music leh recording hi amah K Hminga (blues_n_khuz) kut chhuak vek a ni bawk a, belhchian a dawl hle ang tih chu thil chiang sa a ni.

Video erawh a video dang pawh lo buaipui sak ṭhintu, William Lalrindika kut chhuak a ni a, a kut chhuak dang ang bawkin a simple-in belhchian a dawl leh hle. K Hminga chuan video siam saktu William-a leh amah puitu a ṭhiante zawng zawng chungah lawmthu a sawi.

'Zân Zâi Ri' hla hi a thluk a mawi piah lamah tunlai hla tihchhuah thar zingah chuan a hla thu belhchian dawl ber pawl a ni a, hla thu pawh a rem uluk tih a hriat. Lungleng tam tak hnemtu hla a nih loh tal pawhin lunglen tizualtu hla chu a ni ngei ang.