India ramah theatre hawng leh tawh dawn

Covid-19 vanga ram chhunga cinema hall zawng zawng khar a nih hnuah October 15 aṭang hian hawn a ni leh tawh dawn a, hemi ni hian Bollywood film Khaali Peeli, Tamil film Ka Pae Ranasingam bakah Hollywood movie My Spy, Force of Nature leh The Rental chu thlangzarh a ni ang.

Union Ministry of Information and Broad­casting chuan Ministry of Home Affair (MHA)-in Unlock 5.0 guidelines a siam hnuah cinema hall chungchanga inkhaihhruaina Standard Operating Procedures (SOP) a tichhuak a, he dan hi zawm turin cinema hall nei tute chu an hriattir. 

Containment zone loah chuan cinema hall hawn phal a ni a, hall chhunga seat awm zat 50% aia tam hman phal a ni dawn lo. Social distancing zawm tur a nih avangin ṭhutna inkarah seat dah awl zel tur a ni bawk. Hmaituam vek tur a ni a, hall chhungah ventilation leh air conditioner temperature chu 23 degrees Celsius aia sanga dah tur a ni bawk.