Catholic Mal Zai intihsiakna 'Proclaim' buatsaih dawn

Mizoram pum huap Catholic ṭhalaite tan mal zai intihsiakna, 'Proclaim' chu a vawi khatna atan buatsaih a ni dawn.

St. Mary’s Branch Catholic Ṭhalai Pawl, Electric Veng-in an branch CṬP Golden Jubilee pualin he mal zai intihsiak hi a buatsaih a, Zonet nen ṭangkawpin TV lamah pek chhuak a ni ang. St. Mary’s Branch CṬP hi Mizoram chhunga Catholic Ṭhalai Pawl hming pua din hmasak ber a ni.

Online audition round hmanga bul ṭanin, June 22, 2024 zan dar 8-ah Semi Final chu St. Mary’s Auditorium-ah neih a ni dawn, final hi June 29 zanah neih a ni ang. Online Audition-a tlingte hi Semi Final Round-ah musical instrument 2 hmang chungin an intihsiak dawn a, Final-ah lut tur mi 5 thlang chhuakin, final-ah hian house band nen intihsiak hi an hmachhawn ang. Semi Final leh Final Round hi TV-ah live a pek chhuah a ni dawn a, Alan Rinawma leh Catherine Khiangte ten an host dawn a ni.

Proclaim-a judge turte hi Catholic zai leh music lama Mizoram pum huapa kan hriat lar - Israel Lalbiakrema, Chali (Evenflow Vocalist) leh Francis Lalhmangaiha (Amanga) te an ni. Francis Amanga hi Chief Judge tur niin, Catholic Kohhran zaipawl pui, Diocese Zaipawl ah kum tam tak Conductor a lo ni tawh.