Easy Life-in an band hming Hard Life tiin thlak

English alternative indie pop group, kum 2017-a din Easy Life chuan airline, EasyJet neituten an band hming chungchangah court-a an khin hnuah, band hming chu Hard Life tiin an thlak.

EasyGroup an company hming leh band hming hi a inang lutuk tia sawiin, nimin khan an khing a ni. Royalty payment engmah pe loa Easy brand hming an lo hmang hi a dik lo tia sawiin, company dang pawhin an brand name hman nan hian sum an chawi niin an tarlang. Frontman Murray Matravers chuan, 'Kan lungawi lo hle. Mahse kan band hmingin chuti taka anni a lo tibuai a nih chuan beih let vak kan tum lo," tiin, Thawhlehni khan Leicester band hian an hming thar, Hard Life hi puangin single, 'Tears' an ti chhuak nghal bawk.