X-in user-te like a hide sak

Social media platform lian, Twitter tia hriat ṭhin, X chuan Nilaini aṭang khan user-te privacy venhimna kawng khat atan, post an like-na chu mi dangin an hmuh sak ve theih lohna turin an hide sak.

X neitu, Elon Musk chuan Thawhlehni khan 'private like' hi an kalpui tur thu a lo sawi a, Nilaini aṭang khan user-te chuan site hi an hawnin pop-up, "Private venhimna ṭha tawka awm theihna atan mi tinte Likes chu private sak vek a ni," tih a lo lang a ni.

May 21 khan X-a director of engineering, Haofei Wang chuan user-ten post an like, mi dangin an lo hmuh theih vek hian mawi lo taka beih letna a thlen tir thei a, hei vang hian mi tam tak chuan troll zui hlauin, an public image venhim duhin content-te an like ngam lo phah ṭhin tih a lo sawi tawh bawk. Elon Musk chuan X hmangtuten midang beih let hlauthawng lo an awm a, duh zawng an like theih a ngai a ni, a ti. User-te post like hi mi dangin hmu thei lo mah se, a post-tu erawh chuan a post like-tute a la hmu thei thung.

Kum 2022, October thlaa X a lei hnuah Elon Musk hian thil eng emaw zat a thlak danglam tawh. Twitter tih aṭangin X tiin a hming a thlak a, user dang block theihna titawpin, premium plan te a siam bawk. Nikum August thla khan paid user-te incentive atan, an like-na hi hide theihin a lo siamsak tawh bawk a ni.