Swift-i'n Eras Tour tawp hun tur a puang

Khawvel huapa tour hlawhtling ber, Eras Tour nei mek, Taylor Swift chuan Ningani zana Eras Tour show vawi 100-na, Liverpool, England-a a neihnaah a tour tawp hun tur a sawi chiang.

Kum 2023, March 17 khan US-a Glendale-a Arizona State Farm Stadium-ah Eras Tour hi kick off a ni a, Swift-i'n a tarlan danin a tawpna hi December 8-ah Vancouver, Canada-a BC Arena-ah neih a ni dawn a, hei hi show 152-na a ni ang.

Eras Tour hi a tira an ruahman bak ṭum eng emaw zat belh a ni tawh a, kum 2025 thleng turin an extend leh mai ring pawh an awm a, mahse Swift chuan official-in a tawp hun tur hi a puang ta a ni. Show vawi khatah hian darkar thum dawn performin, hla 40 chuangte a sa ṭhin. Tun hnaia a show neihah phei chuan a album thar ber, 'The Tortured Poets Department'-a hla ṭhenkhatte a rawn bonus bawk a ni. Show hi North America bakah South America, Asia, Australia leh Europe-ah te a nei a ni. Music tour sum la lut hnem ber a ni tawh a, tour aṭanga a sum lak luh hi USD tld 1 a tling tawh a ni.

Taylor Swift chuan show tawpna tur chu la hla viau angin lang mah se, show an ṭan chauh anga a ngaih laiin a vawi 100-na an lo thleng der tawh tih a sawi. A tour neih mek chu a nun pumpui a ni rih tih sawiin, "Hobby-te pawh kha ka nei ve ṭhin a, mahse eng nge tih pawh ka hre tawh lo. Tunah chuan stage-a ka awm loh lai pawhin, inah eng tinge acoustics song mawi dangdai tak, in ngaihthlak duh tur ka neih ang tih ringawt ka buaipui leh ṭhin a ni," a ti.