Khiangte Construction Ṭhazual Lengzem : No 1-ah Kimkima kan hmu ta

Zaithiam aw mawi, zai ngaihnawm thei tak Kimkima chuan a film channa, Zu Zuar fanu (OST) chu Khiangte Construction ṭhazual Lengzem chart-ah pakhatna a rawn nihpui ta.

Kimkima zai thiam zia sawi nawn a ngai lo, hla thar nei loa hun eng emaw chen a reh hnuah film lamah kan hmu ta thung a, mahse film OST hi amah ngeiin rawn siamin a zai ngaihnawm tak kan hre leh thei ta. A hla thu lungrun tak nen, a aw mawi tak hmangin ngaihthlatute ngaihtuahna pawh a hruai thui thei hle. 'Zu Zuar fanu' movie-ah zaithiam vek, Jenny Jathang nen an chang a, lemchan lamah pawh an lo duai lo dun hle. Mizo movie streaming app, Lersia Play-ah pawh film hralh chhuah hnem zingah a tel pha a ni.

Mendal chuan a hla thar, 'Pialral' chu hma rawn sawnpui zelin No 2-ah a rawn lang ta. He hla hi Young Fella nena an siam a ni a, April 1-ah YouTube-ah dah chhuakin, duhtu an tam hle a, view pawh hi mtd 2.5 a nei tling der tawh. Social media lama thawm nei lian tak, Siamsiami Pachuau pawhin boruak a la nei zel a, ama phuah ngei 'Ka Nail Polish' tih chu No 3-ah a lanpui bawk. Grace 10:45 'A vulmawi si' leh Asanga Project ft Ruth Tochhawng 'Min en teh' te chu Top 5-ah an lang bawk.

Ṭhazual Lengzem chart tharah hian Mic Khan, Zothana, HT Lalthanzami te an la cham chhunzawm zel a, anni bakah The Radio leh Vanlalngaihsaki Hmar te chuan an hla thar an rawn lanpui nghal bawk a ni.