Billboard 200: Blackpink-in album an hralh hnem ber 21 Savage & Metro Boomin pakhatna
Billboard 200 chart-ah 21 Savage & Metro Boomin 'Savage Mode II' chu pakhatna a ni a, Blackpink album 'The Album' chu pahnihna niin Pop Smoke 'Shoot For The Stars Aim For The Moon' chu pathumna a ni thung.
Pakhatna 'Savage Mode II' aiin Blackpink-in album an hralh tam
Metro Boomin leh 21 Savage thawkdunin album an tihchhuah 'Savage Mode II' chu US-a album unit hmu chhuak hnem ber niin unit 166,400 a hmu chhuak. Anni hian album sales chu an ngah lutuk lo a, 22,300 chiah hralhin hla mal 10,100 an hralh bawk. Hetihlai hian an album hian stream a ngah hle a, stream maktaduai 182 neiin hemi vang hian chart-ah pawh No.1 an nih theih phah a ni.
Album hralh kal ber chu Blackpink album thar 'The Album' kha a ni a, kar khat chhungin copy 90,700 an hralh. Hetihlai hian streaming-ah 'Savage Mode II' hi an pha lo hle a, maktaduai 28.3 chiah stream an neih avangin chart No.2 an nih a ngai a, album unit 114,500 an hmu chhuak. A lehlam zawnga thlir chuan Blink ho hi an 'loyal' hle a tih theih ang, a chhan chu album copy ngei an ina neih an duh tih a chiang a, album sales-ah ngawr ngawr chuan 21 Savage & Metro Boomin hian an pha lo nasa hle.
Blackpink 'The Album' hi korean hmeichhe album-a Billboard 200 chart-a thleng sang ber a ni a, kum 2008 hnu lama hmeichhe group chart-a thlengsang ber an ni bawk.
Album thar tamna chart
Tunkar Billboard 200 chart-ah hian album thar panga lai top 10-ah a lang. Pakhatna leh pahnihna hi album thar a ni a, hei bakah hian YG 'My Life 4Hunnid' chu palina a ni a, Bryson Tiller 'ANNIVERSARY' chu pangana niin LANY 'Mama's Boy' chu pasarihna a ni bawk.
Top 10-a langte
Pop Smoke 'Shoot For The Stars Aim For The Moon' chu pathumna a ni a, kar hmasa lama pakhatna Machine Gun Kelly 'Tickets To My Downfall' chu paruknaah a tlathla nghal a ni. Juice WRLD 'Legends Never Die' chu pariatna niin kar 13 chhung chart-ah a lang tawh. Pakhatna pawh lo ni tawh YoungBoy Never Broke Again 'Top' chu pakuana a ni a, Lil Baby 'My Turn' chu 10-na niin kar 32 chhung chart-ah a lang tawh bawk.
Taylor Swift 'Folklore' chu top 10-ah a inhlangkai zo ta lo a, 12-na a ni.