Box Office: 'Inside Out 2' in 2024 record a siam

Pixar sequel, 'Inside Out 2' chuan nghahhlelh ang ngeiin thawm a rawn nei ring a, box office-ah 2024 record a rawn siam. US leh Canada-a theatre 4,440-ah tih chhuah niin, North America-ah tlangzarh karah USD mtd 155 a la lut dawn. Kum 2024-a film tih chhuah zingah tlangzarh kara sum la lut tam ber niin, Pixar history-ah opening weekend-a sum la lut tam pahnihna a ni bawk a, 'The Incredibles 2' chauh a pha lo a ni.

International lamah pawh a che ṭha hle a, ni thum chhung lekin USD mtd 140 la lut hmanin, khawvel huapa a sum lak luh hi USD 295 a tling der tawh a ni. Animated film zingah global opening nei ṭha ber niin parent company, Dinsey chuan a sawi. Kelsey Mann direct, he sequel hi critics leh audience lamin pawhin an fak hle. Rotten Tomatoes-ah 91 % zet hmuin, audience score 96% a ni a, CinemaScore-ah 'A' rating a hmu bawk.

'Inside Out 2' hlawhtlinna hi Pixar tan chauh ni lo, theatrical industry pum tan pawh a pawimawh hle a, he a hlawhtlinna hi summer box office boruak siamtu niin, film chhuak tur dang "Despicable Me 4" leh "Deadpool & Wolverine" te tan pawh beiseina siamtu a ni nghal bawk.

Will Smith leh Martin Lawrence-te channa, 'Bad Boys : Ride or Die' pawh a la che ṭha zel a, a kar hnihnaah USD mtd 33 a la hmuh belh thei a, a sum hmuh chhuah hi USD mtd 215.4 a tling tawh.