C Lalṭhazuala (Bematuale) lehkhabu thar 'Ka hla duhzawng'

Beatles hla 'Come Together' fiamthua kaileka 'Bematuale' tia thiam taka saa Zofate min lo chawkhlim tawhtu C Lalṭhazuala lehkhabu ziah, 'Ka hla duhzawng' tih chu nimin khan Education Minister Lalchhandama Ralte-in a office-ah a tlangzarh.

Bu khat Rs 250 man niin Lalchhandama Ralte chuan 'Ka hla duhzawng' lehkhabu chu Zofate rimawi chanchina thil chhinchhiah tlak a nih thu sawiin ṭhangthar zel tana lehkhabu rawn tlak a nih a rin thu a sawi.

'Ka hla duhzawng' lehkhabuah hian C Lalṭhazuala hian kum 1970 aṭanga kum 2000 chawhma lam thlenga Mizo lengzem leh lenglawng hla chuai thei lo hla 42 a thlurbing a ni.