Tribal Power leh LPS-in beat contest buatsaih dawn
LPS leh Tribal Power ṭangkawp chuan November thla hian Beat Contest an buatsaih dawn a, lawmman pawh a ṭha dawn hle.
He beat contest-a tel turte chuan October 24 hma hian LPS-ah demo thehluh tur a ni a, chuta ṭang chuan tel tur an thlang leh dawn a ni.
Intihsiakna ṭan hunah chuan zan khatah band pakhat zelin hun an hmang dawn a, vawi sarih zel an perform ang. Band telte hian an hla sak turah Tribal Power hla pahnih an cover tel a ngai dawn a, sap hla pahnih, Gospel hla Mizo emaw sap emaw hla pakhat zel bakah an duh duh hla pahnih an sak a ngai dawn bawk.
November 12 aṭang hian intihsiakna hi ṭan a ni dawn a, hrechiang duh tan chuan LPS-ah emaw Tribal Power Management lamah emaw zawh fiah theih reng a ni.
Tribal Power hian Thawhṭanni khan an classic 'hit' 'Aizawla mi Ngei' chu music video an siam thar leh bawk a, he hlaah hian Drop Doubt guitarist ZTPA'n a pui bawk a, an YouTube channel lamah dahin an music flow paih miah loin an siam thar leh a ni ber a, an zai ngainatute tan chuan hmaih phal chi a ni lo ang.
Lawmman
Pakhatna Rs 1,50,000
Pahnihna Rs 80,000
Pathumna Rs 50,000