2024 kum tawpah gamers tld 3.320 awm tling dawn

Entertainment industry hnuaiah gaming market hi market lian ber zinga mi niin, gamer pawh kum tin an pung zel. Kum 2023-ah khawvel pumah gamer tld 3.220 an awm a, kumin kumtawpah chuan gamer zat hi tld 3.320 tling chho turin an chhut. Kum 2027-ah gaming industry hlut zawng hi USD tld 522 a tlin rin a ni bawk.

Asia-ah gamer hi tam berin, tld 1.48 an awm a, a dawttu Europe-ah mtd 715 an awm bawk. Latin America-ah mtd 420, North America-ah mtd 285, MENA-ah mtd 168, Sub-Sahara Africa-ah mtd 144 leh Oceania-ah mtd 32 an awm.

Kum tin gamer hi a maktaduai telin an pung chho a, kum khata an pun chhoh tamna ber chu kum 2020 kha niin, hemi kum hian mtd 170 zetin an pun belh. An pun tamna chhan pakhat hi Covid-19 hrileng vang nia ngaih a ni.

Gaming type chi hrang hrang a awm a, heng zingah hian casual games chu gamer zinga 63% ten an khelh ber a ni. Action games kheltu chu a tam ber dawt niin, 39% an awm bawk. Shooter games, racing games, family games leh adventure games ten an dawt.

Statistica-in a tarlan danin, games zinga 20% vel chu kum 18 hnuai lam niin, hei hi mtd 618 a tling. Hetih lai hian gamer zinga a tam ber chu kum 18-34 inkar niin, tld 1.17 an tling a ni. Kum 65 chung lam hi 7% an awm ve bawk.

Game khel ṭhin zinga 63% chuan game khelhna atan PC an hmang a, 31% in Playstation 5, 30% in Android leh 30% in iOS an hmang a ni.