Mizo actress hlawh sang ber turin Ruthy Chenkual contract ziahpui

Zote Entertainment chuan an project thar atan Ruthy Chenkual chu Mizo actress zinga hlawh sang ber turin contract a ziahpui.

Mizo hmeichhe lemchan thiam, Ruthy Chenkual hi Zote Entertainment hian an film thar tur, 'Lerlawri (I ngam ngam ka ngam)'-a chang turin, ni 14 chhung atan Rs 2,50,000 hlawh turin contract an ziahpui a, hei bakah Ruthy hian Lersia Play kaltlanga he film-in a sum lak luh aṭangin 10% share a la nei dawn bawk. 'Lerlawri (I ngam ngam ka ngam)' hi romantic comedy a ni dawn a, director hi Mike a ni. Ruthy Chenkual leh Hriatpuia Kion ten main role an play dawn a, anni bakah lemchan lama hnuhma nei ṭha, Pi Machhungi leh Pi Partei (Lerlawri) te an inlan dawn a, Pu Hmuaka bakah F-a te an inlan dawn bawk. Lersia Play chu co-producer niin director of photography chu Biaka St Photography niin, script hi Tei Zote leh Mike te ziah a ni a, makeup artist hi Jeyve Jongte a ni ang.

Ruthy Chenkual hian Entertainment Society of Mizoram buatsaih Mizo Film Award 2023-ah Best Supporting Actress a lak bakah, I&PR leh MFDS buatsaih Mizoram Film Award 2024-ah Best Actress a la bawk a ni.