All Star Football Match-in lawm a hlawh

Cyclone Remal-in Mizorama chhiatna rapthlak tak a thlen tuartute ṭanpuina tura June 21, 2024, Zirtawpni liam ta zana Rajiv Gandhi Stadium-a Charity Match buatsaih chu a hlawhtling hle. Chhiat tawkte ṭanpuina turin Mizo footballer ṭhate leh kan mi larte an che chhuak a, ṭawiawmtu mipui pungkhawm pawh an ṭhahnem hle.

Mizo mi larte inkhel, All Star Football Match in lawm a hlawh a, Maste-a comment-na hnuaia inkhel en a nuam hle. All Star Football Match-ah hian Nunui Rualhleng team, Yellow Team leh Kimkimi team, Blue team-te intumin, Yellow team hi 2-1 in an chak a ni. Yellow Team tan Thawhlehnaniropuia (Puipuia) chuan goal hnih khungin, Blue team tan Rala Kone chuan goal khat a khung ve bawk.

All Star Football Match-a inlan, kan mi larte hi football hmanga eizawng an ni lo a, mahse beisei phak bakin khelmualah an rawn che a, thlirtute tan pawh a manhla hle. Khelmual chhunga K.Hminga, Zephyr Mapuia, Puipuia, Rala Kone, Jehoa, Zira PC, Valbuanga te che velin mipui beisei an khum a, midang ho pawh rinaiin an che thei hlawm. Hmeichhe pahnih - Cindy leh Grace-i te che vel an hmuhnawm hle bawk.

Sangtei Khuptong, Young Fella leh Mary Dawngi-ten kal khawmte zaiin an awi bawk a, kal khawmte an ṭhap thain, mit leh beng a tlai hle. Perform tur zinga mi, K.Hminga erawh khua a chhiat avangin a che ve hman ta lo.