Movie hlawhchham chiang Misconduct

Actor hlawhtling, filmmaker ni bawk Al Pacino-a film, Anthony Hopkins, Oscar award pawh lo dawng tawh leh Josh Duhamel te channa, Misconduct film chu a hlawhchham chiang hle a, kumina movie chhuak zinga hlawhchham chiang ber a ni hial mai thei.

Misconduct hi UK-ah Zirtawpni kalta khan chhuah ṭan a ni a, hemi ni hian USD 141 chauh a lalut! A siam nana an senso erawh chu USD mtd 11 lai a ni a, an senso phuhru tur chuan sum thawhchhuah tur hmabak a la tam ve hle. Misconduct hi thriller film a ni a, Duhamel hi lawyer lemah a chang a, Pacino hi a thawhpui, a partner a ni. Hopkins thung hi damdawi lam company-a an executive, hlemhle tak lemah a chang a ni. A changtu dangte pawh hi filmstar hlawhtling pangngai tak tak an ni hlawm a, Watchmen-a mi Malin Akerman te, Star Trek Into Darkness-a mi Alice Eve te an ni. Hei bakah hian South Korean actor hlawhtling, Byung-hun Lee pawh a chang.

UK-ah chauh hian a hlawhtling lo a ni lo a, US-ah pawh a hlawhtling chuang lo. He film hi US puma tihchhuah a ni lo a, theatre ṭhenkhatah chauh (limited release) chhuah a ni. Mahse chuti pawh nise a hlawhtling lo ve hranpa hrim hrim tho. US-ah hian February thlaa chhuah tawh kha a ni a, a lakluh zawng zawng chu USD 938,744 chauh a ni hrim hrim a, a hlawhtlinna ber hmun hi South Korea a ni a, Byung-hun Lee chan vang a ni ber; SKorea-ah hian USD mtd 1.2 vel lai a hmuchhuak thei.

Misconduct ni kher lo, movie dang hlawhchham tak tak a awm ṭeuh tawh a, a ṭhen chu Mizoram thleng pawhin a lar phian a, mahse an sum senso aṭanga chhut chuan an sum hmuhchhuah a tlem hle. Chung zingah chuan Antonio Banderas channa, kum 1999-a tihchhuah, The Thirteenth Warrior kha chawi belh pawl zinga mi a ni. He film tihchhuah nana an senso zawng zawng hi USD mtd 160 vel zet a nih laiin box office aṭanga a sum thawh chhuah erawh chu USD mtd 61.7 chauh a ni thung.

Keanu Reeves channa, hmuhnawm ang reng tak, Japan pasalṭhaho chanchin, 47 Ronin pawh kha USD mtd 225 vel lai chu a senso hian a thleng chho a, mahse box office aṭanga an sum hmuhchhuah chu USD mtd 151.8 chauh a ni. John Travolta channa, Battlefield Earth te; Vin Diesel channa, The Chronicles of Riddick te; kum 2011-a tihchhuah Conan the Barbarian te; Daniel Craig channa Cowboys & Alien te leh kum 2011-a tihchhuah Green Lantern te pawh kha movie hlawhchham zinga mi a ni.