SKorea-in K-pop ngainatute tan 'K-Culture Visa' siam dawn

South Korea sorkar chuan ram dang mi, K-pop leh K-culture ngainatute pualin visa thar, 'K-Culture Training visa' a siam dawn.

SKorea Finance Ministry chuan K-Culture Visa hi Korean style music, dance leh modelling lam training duhte tana buatsaih a ni tih sawiin, dil dan tur chungchang kimchang takin a la puangzar lo. He visa thar hi nakkum lam aṭanga pek chhuah theih an tum nia sawi a ni. BTS thli a tleh a, khawvel ram hrang hrang aṭangin South Korea tlawh phah leh, K-culture hre chiang duh an tam phah hle. BTS bakah Korean zaithiam leh lemchan thiamte pawhin khawvel hriat an hlawh chho zel a, hei hi sorkar pawhin tourism sector lama lo hlawkpuina turin remchang a lo siam ve zel a ni. Nikum chhung SKorea tlawhtu khualzin hi vaibelchhe 1.1 vel an tling .